ناحق تؤكولن قانلار يئرده قالماياجاق!

بو گون اورديبئهشت آيي‌نين 22-‌سي، جمعه گونودور. اولوسلار آراسي كتاب سرگيسيندن يورغون- آرغين اينديجه ائوه يئتيشميشم. سرگيده ملّتيمدن گؤردوگوم احوال-روحيه‌دن تام سرخوشام و اورديبئهشت آيي‌نين 22-‌سينه فكرلشيرم. البته آيين اوّليندن بو گونون حادثه‌سي ذهنيمده چاليشير! يقين بيليرسينيز نئچه ايل اؤنجه يعني 1385‌–‌جي ايلده دؤلتين رسمي اورقاني اولان ايران قزئتي بئله بير گونده اؤزل بير سايي‌سيندا اينانيلماز بير تشبّث‌ده ظاهرده اوشاقلار اوچون بير صيحفه‌ليك مثلاً طنز ماهيتي مطلب نشر ائتميشدير. بيرينجي اولاراق تبريز اؤيرنجيلر او مطلب‌لرين اهانتلي ماهيّتينه دقت يئتيرميشديلر. او اهانتلي مطلبين نشريندن ايكي- اوچ گون سونرا تبريز بيليم‌يوردلاريندا اؤيرنجيلرين اعتراض سسي اوجالدي. خبري ائشيتديكده رحمت‌ليك غلامرضا اماني‌-‌يه زنگ ائديب، خبرين نئجه‌ليگيني سوروشدوم. رحمت‌ليك غلامرضا اماني دئدي: " جمعه گونو ايران قزئتي اوزو قيزميزليق‌لا توركلره اهانت ائديب. اؤيرنجيلرده ايران قزئتينه اعتراض اوچون تظاهرات ائتميشديلر. البته بو ايشين باشلانيشي‌دير و گله‌جك گونلرده اعتراضين دايره‌سيني گئنيشلنديرله‌جكدير.

ايران قزئتيندن بير نسخه‌سيني الده ائتمك اوچون چوخ سعي ائتديم آنجاق اله گلمه‌دي، حتّا او مطلبي ايران قزئتي‌نين سايتيندان دا حذف ائتميشديلر. نهايت سؤزو گندن صحيفه‌‌نين بير فوتوكوپي‌سيني اله گتيريب اوخودوم. دوغروداندا سون درجه وقاحت‌له يازيلميشدير. آيدينجاسينا گؤرونوردو بيله-‌بيله و معين طرح و برنامه اساسيندا يازيبلار؛ بو وقاحتين چيركين قوخوسو انسانين روحونا قورا چكيردي. بو قدر خباثت، بو قدر وقاحت، بو قدر آلچاليق و اوزو قيرميزليق اينانيلماز ايدي و البته... تبريز اويرنجيلري حقلي اولاراق رشادتله اعتراض ائتميشديلر و اعتراض پارانقيلاري شهره ياييلاراق تبريز بير داها بشريتّه ضد اولانلارا ميدان اوخودو، صف‌لر آچيق آيدين آيريلدي، ساتقيلانلار، بشريته ضد اونلار بير طرفده، ملّتچيلر و انسان سئوه‌لر باشقا طرفده داياندي. تبريزين  ايگيد اهاليسي رشادتله اؤز ملّي كيمليك‌لريني قوروماق اوغروندا اعتراض يوروشلري كئچيرديلر و تبريزين كوچه‌لري بيرداها آل‌قانا بوياندي! و تبريزين يونون داواميندا آذربايجان شهرلرينده: اورميه‌ده، سولدوزدا، زنجاندا، همداندا، اردبيلده، خييوودا، تهراندا، مرندده مييانادا و .... اعتراضلار باشلاندي و بيرداها آذربايجان آل قان ايله بوياندي و بيرينجي دفعه اولاراق قانلاريميز دوغرودان ملّي كيمليك اوغروندا آخيردي... دؤيولن، يارالانان منيم عزيز باجيم قارداشلاريم هابئله شهيد اولان عزيز باجي – قارداشيم، اينانين ناحق تؤكولن قانلارينيز يئرده قاليب باتماياجاق! اينانين سيزين قيزيل قانينيز ابدي اولاراق آذربايجان شرفينده ياشاياجاق و... دالغالاناجاقدير!

تبريز اؤيرنجيلري‌ و اهالي‌لري‌نين اعتراضلاري‌نين پارانقيلاري بوتون آذربايجاني حركته گتيردي، و حتّا آذربايجاندان اوزاقلارا دا چاتدي و 55 دالغالاري شهر و قصبه‌ده تظاهرات اولدو و بير داها آذربايجان ملّي وارليغيني قورودو!

1385 – جي ايله قدر آذربايجانين گله‌جگينه اورگيمين ديبينده مبهم بير شبهه وار ايدي. آنجاقبو ايلده خورداد آيي‌نين اولاري و ملّتيمين غيرتله ميدانا گلمه‌سي سبب اولدو ملّي بيرليگيميزي دريندن باشا دوشوب و عيني اولاراق گووه‌نم! من اينانديم آذربايجان تورك ملتي هئچ بير توطئه و دسيسه ايله آسيميله اولماياجاق و غرور و شرفله فداكار اوغول و قيزلاري همتي كؤلگه‌سينده ابري ياشاياجاقدير!

بو گون تورك آذربايجانلي‌نين حضور اساساً اعتراض بايراغي‌دير. بوتون حق‌سيزليك‌لره و تحقير- توهينلره اعتراض سسي‌دير! و بيلگين و غيرتلي وطنداشلاريملا بير صفده دايانماق و منيم اوچون بؤيوك شرف‌دير! و اينانيرام بو گون هر بير دئموكراسي‌نين يارانماسي‌نين يولو، آذربايجان تورك ملّتي‌نين قورونوب حمايه اولماسي كؤرپوسوندن كئچير!

ياشاسين بوتون صلح سئوه‌ر انسانلار!

ياشاسين آذربايجان تورك ملتي!

تهران- 22- 2- 1391- اكبرآزاد